donderdag 30 november 2006

twas nen keer rapper voe de verandering

Juste weren van een toerke... Allee van ut het café 't bankske tan... tes de geweunte van achter t lwoppn nog jintje (2,3,4) te goan drinken in t bankske met de bende. En nie alsans; maor als t past goak wok mee. Morgen moek nie echt ville presteern up t werk (nao Mechelen voer een vergaoderinge : dus evenvele up den tring zittn dan werken...), vandoar dak nu nie echt tielik in minnen nest moeste kruppn...
Enfin, da toerke was dus kort , moa krachtig. voe min doeninge toch...
Andere lwoppers goan dad ol te trage vinden voe ne vetlwoop, moa voe mie was dad ol zjirre.
51 minuten (en m' èn een paor minuten an de tring moeten wachten moa kè dadde nie gekilomètreerd : dus verzekers 48minutn) voe den toer langs 't park van Wevelgem (1 ronde), langsen t sportstadion, sportstraote, naor thereske, langs de sneppestraote, over 't duts kerkof, langs de winbergstraote (de boerderietjes zin voer in de zomer, aat klaar es) were noa de moorselestraote en ton were nao t park ol de nieuwstraote en lepoldstraote... K peize ne kilométer of 9 ???
Aak ne kjir goeste è, kgoat exact utrekenen me Frank Spencer zin mèterke...
Dus èk zjidder gelopen of 10 ter eure
Frank ziin zuster èt vandeweke wok ol heur beste gedoan en ze goat zaterdag noa de zjee gon lwoppn, dus kzoe beter wok vant wiekend min beste doene...
Morgen goat alleszinsen nieten zin, moar an 't zjir an min bjenen te voelen (gisteren duurloop), es da moa best wok !

woensdag 29 november 2006

nen vrijen voornoene

Vanuchtend de sjanse gehad van een paar eurkes vrie te èn : gin (betaald) werk, gin joengens (dedie moestn in skole zin). In vworbereidinge voer Deerlijk, de kerstcorrida, ton moa nen kjir nen krak forcee gedoan en een eurenalf gelwoppn. Hoeveel kilometers dak der juste deure gedraaid è, wit ik nie, maor 't zal ter nie verre van zin. Voe diegene van de streke : gestart in Wevelgem, langsent mollegat, over bissegem brugge nao marke, langst fietsroutepad (22, 7 en nog een poar) tot up Marke platse, ton al achtern langs delabies naor de preshoek, onder de brugge en ton berg up nao Lauwe, onder den tunnel, langsent ter biest noa Wevelgem were.
kpzeize zwon 14 kilomèters, mao tstikt up gin jin !
Min vintje at voe mie een paar mp3tjes grjid gezet up da spul van den aldi (dad ier ol 3 jaor in oes kasse ligt). 't wa den jisten kjir dak me zukken spellement up minne kop liepe. En gjistig voe de muziek, moar tpast toch nie echt perfect zulle : da jinnen woorke viel da reekans ut. of dat an de anatomie van min oren ligt of an da spel, ken è der gin gedacht van. Enfin, ton moa me jin oorke vwort gelwoppn. tging wok.
Miskiens nen tip voer jin of ander kerstcadootje : goeie workes voe da spel. t skint dat er azwo van die skelpn bestoan, die alsans passen ?
Moest ek meelwoppn me nen marathong, tzoet de moeite zin voe nen kjir tinvesteern, moar voe een bikke te joggn es da ol nie nwodig.
Enfin, da spul dus in min oren en up tempo geloopn : stairway to heaven at bergup gink, the forrest in t bos : twa lik dat em wiste woa dak ginge lwoppn ! (nie van wei, ollemaole pure buzze). tWas een experimentje me cdkes dam me ier juste liggn an. Jat zin beste gedoan voe da spel een bikke te stoffeern, moa juste de latste kilomèter begoste kik were tzelfste te worn : juste nie rap genoeg gelwoppn zkers ? ak nog nen kjir dienen toer lwoppe, en diezelfste muzik stoat der nog up, zoe ne kjir keun probeern voe gin 2 kjirs tzelfste te moetn oren ! speed it up girl !

dinsdag 28 november 2006

tzin alsans dezelfde miensn da je tegenkoemt

ei gidder da wok ? aj nen toer ant lwoppn zit, daj alsans dezelfste tegenkoemt ? Gistern verzekers voe den derde kjir vandemaond dezelfsten rwoon jogger gezien, we beginn ol beleefd te knikkn noar mekoar. tes moar dat em stief veel rapper lwopt of akik, anders me zoen nog een klapke keun doen.
Een bikke verder kwam ik een jonk meiske teegn, en me da tempo was 't wel meuglijk voer confidensjes t'odden. kvin kik dad alsans gjistig voer azwo een klapke te doene, moar mjistal goa min tempo ton nao beneen. ei gidder da wok ?

maandag 27 november 2006

Geheimtaal of geweun dialect ?

Blikbaor es da westvloams nie goe te verstoane voer ollanders. Dad es nu wok nie de bedoelinge van de site ! Moar omdamme gin miensn willn affronteern (lap zeg, franske woorn goan ze wok nie verstoan vaneigens), voe jinne kjè nutzonderinge : sebiet in min skwonste vloams een vertaolinge (et pour les francophones : la même chose !)

Geheimtaal of gewoon plaatselijke omgangstaal ?
Blijkbaar is het westvlaams niet goed te begrijpen voor Nederlanders. Dat is nu ook niet de bedoeling van deze blog. Maar omdat we geen mensen willen "affronteren" (betekent beledigen) - verdraaid, franse woorden zullen ze ook niet begrijpen, vanzelfsprekend - voor één keer dus een uitzondering. Weldra dus in het mooiste vlaams een vertaling (en voor de franstaligen hetzelfde)

Ge moe nu toegeevn, tkliengkt toch vele beter in tskwon vloams ! Dus da wadde lesse voe vandage en tes nu gedoan dermee : off topic ! (oe daj dad up zin wevelgems zegt zoek wok nie weten : miskiens tips van gidder ?)

donderdag 23 november 2006

kèn eindlik deure wie da frank spencer es !

Vanavnd eik eindlik deure da frank spencer geweun de broere van bernadette es ! En zie moa klappn van eur broer die wok marathongs lwopt.. !
Da juste heur broere live gezien en je trekt wel up de foto van frank spencer, dus ik peisde ol : zoet em zinne ? We zin een bitje aan de klap (achter tloppen welteverstaone !)
Zegt ie ton wel vanolles over zin vrouwe, etten leure en azwo... tingelingeling !
gjestig van azwo een bitje te ziene wien da wien es !

twas ol een ende geleen dak me bernadette twoppe gelwoppn a, sjanse da ze wok meelwopt in deirlik, me goan nu weer een bitjen afspreekn voe twoppe te goan lwoppn. dus a joes zundag zie lwoppen up de happy days : zwaai nen kjir njè !

dinsdag 21 november 2006

sjanzement de dekor !

Nen nieuwn name voe de verwarringe nie te grwoot te maakn
ge zoe peizn dak int bestuur zitte of azwo

nie van !

ken ben kik moa een geweun lid, nie mjir of dadde !

vande weke zelfs nog nie vet vele gelwoppn, moa kei der gin ertzjir van, ne kjir a zwo en nen kjir anders... miskiens morgen ne kjir nen forcee of azwo....

kga der ne klir up letten of dak frank spencer nie tegenkomme in Wevelgem

jeit zukken foto up zinne site stoan, moar in den donkern moeie da moar erkennen...
tegen datie em mie gevondn eit, lwop ik miskien wok ol marathongs...

vrijdag 3 november 2006

De nieuwe utrustinge es getwond

Gisternavund èn ze vant bestuur under beste gedoane (me goe soepe) voe der een extratje bie te doene : zèn wok ne modesjow gedoane met de nieuwe utrustinge ! zes ol vele skwonder dan de vworrige, en voeral : vollediger ! We goan nu een korte en een lange broek èn, en een spellementje zoender mown, in de winter ton jin me mown, en wok nog een veste, moa de dee wa nog nie grjid.
Komt oes ollemaole mo bewondern up de kerstcorrida in deerlik tenden van december (de weke vwo kestag) (am me ton olles ol goan èn..)

donderdag 2 november 2006

Boekenbeurze 2006

kben juste were van antwerpn, tes tid da ze die beurze nen kjir een twasen elders oedn : zukken volk en da spel koste da nie slikkn. tbegoste ol me den bus in berchem stoasje : we kostn der nie up : me peisden da me skwonne in de reke moestn stoen voe te betaaln, vaneigens da me ton nie meekosten... Den twidden bus èm me ton moa zwart gereen, of twa were van dadde...
Sjanse dam me ol ticketn oan van te vworn : wuk een reke voe binnen te komn ! kpeize da zen bikke te vele succes èn...
kè getwiffeld voer een poar boekn van tloppn mee te pakkn (te kwoppen vaneigens), moar omdak nie goe wiste wukn, goa kut jist moa vroagn an andern. Miskiens dat de bibliotheke nog een paar goeie èt. De titels zin ol upgeskreevn, kanne ze nog alsans kwopn tus.
Intusn èk zjir an min voetn vant slentern. Deur ol da volk gingtat doar nier voorrut ! En ol die joengens : noste kjir proberek butten de vakanse te gane ! 't stond up underne website dat vandage kalme gink zin : min worre !

woensdag 1 november 2006

Vinten zin nie curieus

Vanuchtend twoogdek min skrifsels an minnen vint en je wildet nie jens leezn. kzoe ier gerust jin of andere confidentie keun doen, je zoet nog nie leezn. (ken è gin anoedingn of azwoa, moar joa, moestek der èn, toen nog nie)
Verzekers dat er ier biekans gin vintn meezleen, (an de commentaarn te zien wok gin vrouwn), blogs zin eigl nie echt intressant van nen andern, peis ik. (kleeze kik eiglik wok biekans ginne)
Deurdat in 'twestvloams geskreevn es, goan der nie echt veel pottekiekers zin. Buttn dedie da kik zelfve zoe gezeid èn dak ier blogge, est er gin katte die dadier zoe bekikken.
Aak leezrs zoe willn èn, moetek miskiens ne kjèr een vertalingske naar tskoon vloams moakn. Moa da goan we dus nie doen, tes de bedoelink nie da hod en kljin pierke dat ier moetn leezn.
tzudden van westvloandren moe zin eign toale onderoedn ! antwaaaaarps keuj ol genoeg zien op de veetee im, hèt doar verzekers den jinne soap achter nandern. Li i i i mburgs gerakt zoverre nie en oastvloams verstoan molik. azwo...